Sant’Antonino in processione 2018

Che bella festa, nu paese sano
corre a cercà perduono ‘o Prutettore:
che sentimento, nun me pare overo,
tanta sincerità cu tanto ammore.

‘A cchiesa è tutta a festa appriparata,
cantano a coro mille lampatine:
‘A gente tutta quanta addenucchiata
stà nnante ‘o Patre ‘e tutte ‘e Surrentine.

Ce stanne tutte, uommene e guagliune,
pagliette,mastedascie e sartulelle,
cammise culurate, prievete e cafune..
surdate,cappillette e pacchianelle.

‘A copp”o trono tutto argiento e oro
‘o Santo benedice a tutt”e figlie
e cu ‘nu sguardo overamente ‘e core,
se ll’accarezza e dà buone cunziglie.

‘O core vatte ‘e tutta chesta gente,
e ‘mpont’ e labbra sponta na preghiera:
chi cerca troppo e chi nun cerca niente,
e chi nu poco ‘e fuoco p”a vrasera.

Fa Santo ‘a messa; ‘a messa d”o Rettore
int”o Succorpo santo e beneritto,
addò fuje atterrato ‘o prutettore.
Silenzio santo! zitto,zitto,zitto.

Nu raggio ‘e sole bello e curiuso
se ‘mpizza ‘nchiesa ‘a dint’o fenestrone,
e nnante ‘o Santo,viscolo e cianciuso
pur’isso cerca ‘a benedizione.

Po corre mmiez”e campe ‘e copp’ e Tore
addò sta state farrà festa ‘o grano
e cu nu sguardo tiennero d’ammore,
porta ‘a speranza ‘o bbuono crestiano.

‘A fora ‘a cchiesa, a ccoro ‘e castagnare
mannano ‘a voce nfino a ngopp’e stelle..
tammurre,palluncine,turrunare,
nucelle americane e trommettelle.

‘A banda ntona ‘a ccoro na marcetta
e porta into Surriento l’allegria!
pennene d”e balcune, e che freschezza
geranie rosa e sciure a fantasia.

Frevaro, tu si curto e non amaro
pecchè sì ‘o vero paggio ‘e Primmavera,
pecchè stu Santo aurioso e caro
ce puorte ogne anno sotto ‘a cemmenera.

Surriento ‘nfesta,arance e mandarine
o giallo, o verde o cu nu bello sciore
se so’ affacciate ‘a tutte sti ciardine
pe’ cantà grolia ‘o Santo Prutettore.

Campane a festa, ‘o Santo mo se move
e và p”e case ‘e tutt”e Surrentine
malate e scunzulate si nne trove
‘e fa sanà ‘e leva ‘a copp”e spine.

‘A festa corre pure quanno è Maggio
e fa chell’aria doce e cummuvente;
va p’e colline,vole p’e muntagne
e ‘mpizza ‘a ggioia ‘npietto a tanta gente..

‘A banda sona; ‘o Sole è cannaruto,
allucca e fa denare ‘e vennetore,
‘e santità Surriento s’è vestuto..
pecchè vò bene ‘o Santo Prutettore!

“Schiuppàino ‘e vase
e llacreme cucente,
scurretteno int’‘a ll’uocchie ‘e marenare,
e stettero abbracciate ccà a Surriento,
zitte,addenucchiune,…
‘nnant’’a chill’ardàre..!”